TAISPEÁNTAS ÚR / NEW EXHIBITION - Seán Ó Flaithearta
Áislann Ghaoth Dobhair, An Screabán
1 Iúil 2011 – 31 Deireadh Fómhair 2011
1 July 2011 – 31 October 2011
www.angailearai.com
Talamh Dóite / Fired Ground
Má théann tú ag siúl ar an bportach san earrach feicfidh tú agus mothóidh tú plandaí agus bláthanna ag fás, agus cloisfidh tú ceiliúr na n-éan sa scrobarnach faoi do chosa agus go hard os do chionn. Nuair a chuirtear lasóg na creiche leis an talamh lena dhó bíonn an portach ina thost; ciúnas i ndiaidh anfa. Ní bhíonn fágtha ach an tírdhreach dúloiscthe, gan a éide fód. Bíonn cruth an talaimh le feiceáil, tarnocht faoi chlóca uaigneach dúchiúnais. Bíonn an saol ina stad.
Bíonn teacht ar earraí agus ar shlite maireachtála a bhí faoi cheilt le cúpla glúin siar, nochtar claíocha cuibhreann, aiséiríonn smionagar tithe as patrúin dhubha na dtrinsí iompaithe, bachtaí móna a gearradh agus a baineadh le sleán anaithnid. Gréithe cistine a úsáideadh le líon tí a chothú, i bhfad siar, caite le taobh gréithe eile nach bhfuil ann ach le seal. Nochtar seanrothair high nelly, ag meabhrú dúinn gurbh é an capall iarainn a rialaigh rithim an tsaoil tráth.
Fágann an coirloscadh gan éifeacht seo páirc áir mar a mbíodh tírdhreach docheansaithe, aithris mhaoithneach ar shean-nósanna feirmeoireachta leis an talamh a ghlanadh. Faightear léargas sa slad gan chéill ar an tírdhreach ar chumas foréigin an duine agus ar an mí-úsáid a bhaineann sé as an gcumhacht a mhothaíonn sé atá aige. Is gníomh cogaidh é an chré a dhó. Beatha a ruaigeadh, gortghlanadh ar neacha beo.
Déantar machnamh sa taispeántas seo ar an ngaol atá againn leis an timpeallacht agus an méid a bheimis sásta a dhéanamh le cead ár gcinn a fháil. Dírítear sa saothar ar a mbíonn fágtha i ndiaidh an áir. Bíonn an tírdhreach apacailipteach mar a bheadh scáthán ann ar ár nádúr daonna.
Baineadh úsáid as amhábhair as an bportach féin, mar théama agus mar mheán ar féidir lámh a leagan air, i bpróiseas cruthaithe na saothar seo le freagra níos pearsanta a thabhairt ar an gcaoi a gcuirtear talamh ar thine.
Tuilleadh eolais: seanoflaithearta@eircom.net
